ରଜ ପର୍ବ
**********
ଅଜିତ କୁମାର ତ୍ରିପାଠୀ (ଶିକ୍ଷକ)
************************
ଆଦ୍ୟ ଆଷାଢରେ ଦେବ ସ୍ନାନପରେ ରଜ ବିଜେ କରେ ମହୀ ।
ଆକାଶରେ ଘନ କଲେ ଆଛାଦନ କେକୀ ନାଚେ ତାତା ଥେଇ ॥
ଚାତକ ଆତୁରେ ଜଳ ପାନ ଲୋଭେ ଚାହିଁଛି ଚଞ୍ଚୁକୁ ଖୋଲି ।
କୃଷକ ବିଚାରା ହଳ,ଲଙ୍ଗଳରେ ଜମିକୁ ଚଷିବ ବୋଲି ॥୧॥
ଧରିତ୍ରୀକୁ ଦେଖ ନୁଖୁରା ଶୁଖିଲା ରୁକ୍ଷ,କର୍କଷ,ବନ୍ଧୁର ।
ମଉସୁମୀ ଏଣେ ଲୁଚକାଳି ଖେଳେ ଗଗନ ମେଘ ମେଦୁର ॥
କଦବା କ୍ୱଚିତ ଲଘୁଚାପ ନୃତ୍ୟ ସାମାନ୍ୟ ଛିଞ୍ଚଇ ଜଳ ।
ରଜରେ ମଉଜ ହୋଇ ସଜବାଜ ନାରୀ ମାନେ ଦଳ-ଦଳ ॥୨॥
ପୋଡପିଠା,ଖଜା, ଖିଲି ପାନ ମଜା ମହ-ମହ ହୋଇ ବାସେ ।
ଦୋଳି,ଖେଳ,ଗୀତ ପୋଷାକ ବିନ୍ୟାସ ମାତନ୍ତି ହସ ଉଲ୍ଲାସେ ॥
ମାଟି; ମାଆ ପରି ଗର୍ଭେ ଥାଏ ଧରି ନାନା ଶସ୍ୟ,ଫଳ,ମୂଳ ।
ରଜସ୍ୱଳା ପରେ ବସୁଧା ସ୍ନାନରେ ଧରି ଥାଏ ଧରା ତଳ ॥୩॥
ବର୍ଷା ଜଳ ଘେନି ଉର୍ବର ଅବନୀ କୃଷକ କରେ କର୍ଷଣ ।
ନୂତନ ଫସଲ ଉତ୍ପାଦନ ପାଇଁ ଆନନ୍ଦେ ହୁଏ ମଗନ ॥
ନାରୀ ଜାତି ମାନ ଦିଅନ୍ତି ସମ୍ମାନ ରଜ ପାଳି ତିନି ଦିନ ।
ପୃଥିବୀ ଜନନୀ ଶୀତଳତା ଘେନି ପରଷନ୍ତି ଖାଦ୍ୟ ମାନ ॥୪॥
*********************************
ଅଜିତ କୁମାର ତ୍ରିପାଠୀ(ଶିକ୍ଷକ)
କୁଲାଡ଼, ଭଞ୍ଜଭୂମି, ଭଞ୍ଜନଗର, ଗଞ୍ଜାମ
ଭ୍ରାମ୍ୟଭାଷ - ୯୪୩୮୨୮୯୯୪୮
କୋଡ଼ - ୭୬୧୧୩୧
***********************
No comments:
Post a Comment