---- ରାକ୍ଷୀ -----
ଚିକ୍'ମିକ୍ ସୁତା ଧାରେ ନାଇଁସେ ଗୋ
ଇଟା ତ ପେରେମର୍ ଡୋର୍,
ରାଖି ପୁନି ଦିନ ବାଧିଁଦେମି ଦଦା
ମନେ ଅଛେ ମର୍ ସୋର୍।
ମହାଦାନି ବଲି ରଜାର୍ ହାତେ ଯେନ୍ତା
ବାଁଧିଥିଲେ ରାଖି ସୁତା,
ତମର୍ ହାତେ ହେନ୍ତା ବାଧିଁ ଦେମି ମୁଇଁ
ଦଉଛେଁ ତମକେ କଥା।
ସଖା କୁଷ୍ଟଁ କେ ଶାଢି ଚିରିକରି
ବାଁଧିଥିଲେ ପନତ୍ କାନି,
କୁରୁସଭା ତଲେ କୁଟି ବସ୍ତର୍ ଦେଲେ
ପାଞ୍ଚାଳିର୍ ମନ୍ ଜାନି।
ଭାଏ ବହେନର୍ ପେରେମର୍ ଝର୍
ଝରୁଥଉ ସବୁ ଦିନ୍,
ରାଖି ଥଉ ସାଖି ସମିଆଁ କେ ଯୁଖି
ନାଇଁ ହଉଁ କେଭେ ଭିନ୍।
ବଜର୍ ଲେଖେନ୍ ବର୍'କସ୍ ହଉ
ତମର୍ ଦୁଇଟା ବାହା,
ଡାକ୍ ଦେଲେ ଦଦା ନରଧି ଆଏବ
ବିପଦେ ହେବଗୋ ସାହା।
<<<>>>===0===<<<>>>
ନାମ-ଆଶୁକବି ହେମନ୍ତ ଦାଶ
ସଂପାଦକ "ନିଷାନ" ଓ ସମ୍ବାଦ ସଂପାଦକ ସାହିତ୍ୟ ଘର, ଗୁଡଭେଲା ବ୍ଲକ, ବଲାଙ୍ଗିର
ମୋ-୯୯୩୭୬୮୮୫୫୧
No comments:
Post a Comment