ଶ୍ରାବଣ ମାସର ପୂର୍ଣ୍ଣମୀ ତିଥିରେ
ଆସଇ ରାକ୍ଷୀ ବନ୍ଧନ
ଭାଇ ଭଉଣୀର ସ୍ନେହର ସମ୍ପର୍କ
ରହିଅଛି ଏହି ଦିନ ।
ଭାଇର ମଥାରେ ଭଉଣୀ ଦିଅଇ
ଅକ୍ଷତ ତିଳକ ଚିହ୍ନ
ଭାଇର ହାତରେ ରାକ୍ଷୀଟି ବାନ୍ଧିଣ
ଖୁଆଇଥାଏ ମିଷ୍ଟାନ୍ନ ।
ତୁଳାର ରାକ୍ଷୀଟେ ନୁହଁଇ ସାମାନ୍ୟ
ଏତ ସ୍ନେହର ବନ୍ଧନ
ଭାଇ ହାତେ ବାନ୍ଧି ଭଉଣୀ ମାଗଇ
'ରଖିବୁ ମୋହର ମାନ' ।
ପୁରାଣ ପୃଷ୍ଠାରୁ ଆରମ୍ଭ ହୋଇଛି
ରାକ୍ଷୀ ବନ୍ଧନର କଥା
ଲକ୍ଷ୍ମୀ ବଳିଙ୍କଠୁ ଚଳି ଆସୁଅଛି
ଯୁଗେ ଯୁଗେ ଏହି ପ୍ରଥା ।
ଅତିଦାନୀ ବୋଲି ଦାନ ଦେଉଥିଲା
ରାକ୍ଷସ ରାଜନ ବଳି
ତିନି ପାଦ ଭୂମି ପ୍ରଭୁଯେ ମାଗିଲେ
ପାତାଳକୁ ଦେଲେ ଠେଲି ।
ଦାନ ଦେଇ ପୁଣି ବଳିଯେ ହୋଇଲା
ପାତାଳର ଅଧିପତି
ଦ୍ବାରରେ ତାହାର ଦ୍ବାରପାଳ ହେଲେ
ନିଜେ ପ୍ରଭୁ ଲକ୍ଷ୍ମୀ ପତି ।
ଭାଇ ବୋଲି ଲକ୍ଷ୍ମୀ ବଳିଙ୍କ ହାତରେ
ରାକ୍ଷୀଟିଏ ବାନ୍ଧି ଦେଲେ
ପ୍ରତି ବଦଳରେ ନିଜର ସ୍ବାମୀଙ୍କୁ
ବଳି ଠାରୁ ମାଗିନେଲେ ।
ଭାଇ ଭଉଣୀର ସ୍ନେହର ସମ୍ପର୍କ
ରହିଗଲା ଏହି ଦିନ
ସେହିଦିନ ଠାରୁ ଆଜି ଯାଏ ଅଛି
ପବିତ୍ର ରକ୍ଷା ବନ୍ଧନ ।
ମହାଭାରତରେ ବର୍ଣ୍ଣିତ ହୋଇଛି
ରାକ୍ଷୀ ବନ୍ଧନର ଗାଥା
କୃଷ୍ଣଙ୍କ ହାତରେ ଦ୍ରୌପଦୀ ବାନ୍ଧିଲେ
ରହିଅଛି ଏହି କଥା ।
ଦ୍ରୌପଦୀ ନିଜର ପାଟ ବସ୍ତ୍ର ଚିରି
କୃଷ୍ଣ ହାତେ ବାନ୍ଧି ଦେଲେ
ଦ୍ରୌପଦୀଙ୍କ ମାନ ରଖିବା ପାଇଁକି
କୃଷ୍ଣ କଥା ଦେଇଥିଲେ ।
କୁରୁସଭା ତଳେ ହେଉଥିଲା ଯେବେ
ଦ୍ରୌପଦୀ ବସ୍ତ୍ର ହରଣ
କୋଟି ବସ୍ତ୍ର ଦେଇ ଶ୍ରୀକୃଷ୍ଣ ରଖିଲେ
ଦ୍ରୌପଦୀଙ୍କର ସମ୍ମାନ ।
ଇତିହାସେ ଅଛି ଚିତ୍ତୋର ଗଡର
ମହାରାଣୀ କର୍ମାବତୀ
ମୋଗଲ ଶାସକ ହୂମାୟୁନ୍ ହାତେ
ବାନ୍ଧିଥିଲେ ରାକ୍ଷୀ ଗୋଟି ।
ତାହା ବଦଳରେ ମୋଗଲ ଶାସକ
ଦେଇଥିଲେ କଥା ତାଙ୍କୁ
ଶତ୍ରୁ କବଳରୁ ଚିତ୍ତୋର ଗଡକୁ
ନିଜେ ରକ୍ଷା କରିବାକୁ ।
କିମ୍ବଦନ୍ତୀ କହେ ପାଟପୁର ଗାଁର
ମାଳତୀ ନାମେ ଝିଅଟେ
ସେଇ କୁନି ଝିଅ ରାକ୍ଷୀ ବାନ୍ଧି ଥିଲା
ଶ୍ରୀ ଜଗନ୍ନାଥଙ୍କ ହାତେ ।
ଗଜପତି ରାଜା ପାଟପୁର ଗାଁକୁ
ରଖିଲେ ମାଳତୀର ନାଁ
ସେହିଦିନ ଠାରୁ ନାମିତ ହୋଇଲା
'ମାଳତୀ ପାଟପୁର' ଗାଁ ।
ଭାଇ ଭଉଣୀର ପବିତ୍ର ସମ୍ପର୍କ
ଛୋଟ ଏକ ତୂଳା ରାକ୍ଷୀ
ଦୁଇ ହୃଦୟର ସ୍ନେହ ମମତାର
ଯୁଗେ ଯୁଗେ ଅଛି ସାକ୍ଷୀ ।
ବେଦବ୍ଯାସ ମେହେର
ଗ୍ରାମ:-ଖଇରପାଲି
ଥାନା:-ପଦ୍ମପୁର
ଜିଲ୍ଲା:-ବରଗଡ଼
ମୋ:-୯୯୩୮୩୩୯୦୨୯
No comments:
Post a Comment