
::: ସମ୍ପର୍କ :::
-------
କୋଉ ଅଦୃଶ୍ୟ ଦେବତା
ମୋତେ ଥୋଇ ଜନନୀ ଗର୍ଭରେ
ରଚିଲା ସମ୍ପର୍କ ଅସରନ୍ତି ଭଲପାଇବାର ।
ପ୍ରଥମ କୁଆଁ କୁଆଁ ରାଵରୁ
ଆରମ୍ଭ ସେ ସମ୍ପର୍କ
ବୀଜରୁ ମହାଦ୍ରୁମ ଏବେ
ଘରର ଏରୁଣ୍ଡି ଡେଇଁ
ସାହି, ଗାଁ , ସମାଜ ଓ ସାଙ୍ଗସାଥି ଗହଣରେ !
ଠିକ ଭାବେ ବୁଝିବା ବେଳକୁ
ସମ୍ପର୍କ ସବୁଆତଯାତ
ମା' , ବାପା , ଭାଇ ଭଉଣୀ
ସ୍ତ୍ରୀ, ପ୍ରେମିକା
ରାଜାପ୍ରଜା, ନେତା ଭୋଟର
ମାଲିକ , ଶ୍ରମିକ
ଅଫିସର, କର୍ମଚାରୀ
ଆହୁରି କେତେ କେତେ
ଅସରନ୍ତି ଶ୍ରେଣୀ ଓ ବିଭାଗରେ ।
ପ୍ରକାର ପ୍ରକାର ସମ୍ପର୍କ
ନିର୍ଭର କରେ ପାଳିବା ଓ ପୋଷିବାରେ
ସାମୟିକ , କ୍ଷଣସ୍ଥାୟୀ, ଆଜନ୍ମ ଓ ଜନ୍ମଜନ୍ମାନ୍ତର
ବଢିଚାଲେ କି ଛିଣ୍ଡିଯାଏ ।
କେତେ ରୂପ ରଙ୍ଗରେ ସଜେଇ ହୁଏ ସମ୍ପର୍କ
କେବେ ମାନ ଅଭିମାନରେ
ତ କେବେ ଇର୍ଷାରେ ଆଉ କେବେ
ପଦ ପଦବୀର ଅହଂକାରରେ।
ସମ୍ପର୍କ କି ବଞ୍ଚେ ଶପଥ ପାଠରେ ?
ତୁଳସୀଧଣ୍ଡା କି ମହାପ୍ରସାଦ
ସାମୟିକ ଉତ୍ତେଜନା
ଭୋଟବେଳେ ଅବା
ଚଉକି ବଦଳାର ଷଡ଼ଯନ୍ତ୍ର
ପଶାପାଲିରେ !
ସମ୍ପର୍କ ଦେଖିବ ତ ଆସ
କର୍ଣ୍ଣ ଓ ଦୁର୍ଯ୍ୟୋଧନ,
ଅର୍ଜୁନ, ଶ୍ରୀକୃଷ୍ଣ
ରାଜା ରଣଜିତ ସିଂ ଓ ସେଇ ଗରିବ ବୁଢ଼ୀ
ସମ୍ପର୍କ ବୁଝିବ ତ ଦେଖ
ଦେଶକୁ ଜଗିରହିଥିବା ସୈନିକ
ଅବା ନୀତିଦିନ ରେଳଲାଇନ ପରଖୁଥିବା ଟ୍ରାକମ୍ୟାନ !!
ସମ୍ପର୍କକୁ ତଉଲନା ,
ରଙ୍ଗ ଦିଅନା ସମ୍ପର୍କକୁ
ଭାଗଭାଗ କରନା ଆଭିଜାତ୍ୟରେ,
ବିନାଆସକ୍ତିରେ
ଭଲ ପାଅ ତାକୁ
ଦେଖିବ ସମ୍ପର୍କ ଆପେଆପେ ଲମ୍ବିଯାଉଛି
ତମ ଭଲପାଇବାର
ପରିଧିରେ !!
--------------/////-------------
-ଶିବ ଶଙ୍କର ସାହୁ
ସମ୍ପର୍କ : ରେଳସଦନ, ଭୁବନେଶ୍ୱର
@୯୪୩୭୫୮୪୫୮୯
୮୪୫୫୮୮୫୨୧୯
No comments:
Post a Comment