ରାକ୍ଷୀ - ଡଃ ପଦ୍ମଲୋଚନ ରାଉତ , ମାଲକାନଗିରି

    ରାକ୍ଷୀ

--------------

ମୋ ଦେଶ ଭାରତ ଜଗତରେ ଶ୍ରେଷ୍ଠ 

       ସଂସ୍କୃତି ତାର ମହାନ 

ଦୟା ପ୍ରେମ ଶାନ୍ତି ବନ୍ଧୁତା ବନ୍ଧନେ 

       ସମର୍ପିତ ପ୍ରତି ପ୍ରାଣ  l   1

ଶାନ୍ତି ପ୍ରଦାୟିନୀ ଆର୍ଯ୍ୟl ବର୍ତ୍ତ ଭୂମି 

    ଜଗତେ କଲ୍ୟାଣ କରି 

ଏକତା ବନ୍ଧନେ ବାନ୍ଧିଛି ଜଗତ 

       ବୈରୀ ଭାବ ପରିହରି  l  2

ପରିବାର ଆମ ବୈକୁଣ୍ଠ ପୁର 

   ସେନେହ ମମତା ଡୋରୀ 

ଭାଇ ଭଉଣୀର ପବିତ୍ର ସମ୍ପର୍କ 

     ଆଶିଷ ପଡଇ ଝରି  l  3

ଧାରା ଶିରାବଣେ ବାରି ପଡେ ଝରି 

    ଗଗନେ ବଉଦ ମାଳ 

ବଳଦେବ ଜନ୍ମ ରୋହିଣୀ ଗରଭୁ 

     ପୂଜା ପାଏ ଚାଷୀ ହଳ l   4

ଶ୍ରାବଣ ମାସରେ ଗହ୍ମା ପୁନେଇଁ 

     ଜନ୍ମିଛନ୍ତି ବଳରାମ 

ହଳ ମୁଷଳ ଧାରୀ ମହାପ୍ରଭୁ 

     ନୀଳାଚଳେ ବିଦ୍ୟମାନ  l  5 

ପୂଜା କରେ ଚାଷୀ ତା ହଳ ଲଙ୍ଗଳ 

      ଭକତିରେ ଗୋରୁ ଗାଇ 

ଗୋ-ବତ୍ସା ଚରାଇ ଲୀଳା କରିଛନ୍ତି 

    ଗୋପ ଦାଣ୍ଡେ ଦୁଇ ଭାଇ  l   6 

ଭାଇର ହାତରେ ମମତାର ଡୋରୀ 

    ଅଟେ ଭଉଣୀର ରାକ୍ଷୀ 

ରକ୍ଷାକରେ ଭାଇ ଭଉଣୀ ଜୀବନ 

    ରାକ୍ଷୀ ପରା ତାର ସାକ୍ଷୀ  l  7

ବାସୁଦେବ ହାତେ ବାନ୍ଧିଥିଲା ଡୋରୀ 

    ପାଞ୍ଚାଳୀ ବସନ ଚିରି 

କୋଟି ବସ୍ତ୍ର ଦେଇ ଲଜ୍ୟା ନିବାରିଲେ 

    ଦୁଷ୍ଟ ବୁଦ୍ଧି ନାଶ କରି  l    8

ପୁରାଣରେ ଅଛି ଅନେକ ପ୍ରମାଣ 

     ଶ୍ରାବଣ ପୁନେଇଁ କଥା 

ଇନ୍ଦ୍ର ହାତେ ବାନ୍ଧିଥିଲେ ଶଚୀ ଦେବୀ 

    ରକ୍ଷା କବଚର ସୂତା  l   9 

ବୃତ୍ରାସୁରକୁ ବଧି ଥିଲେ ଇନ୍ଦ୍ର 

    ଶ୍ରାବଣ ପୁନେଇଁ ଦିନ 

ପାତାଳେ ଚାପିଲେ ବଳୀକୁ ଶ୍ରୀହରି 

   ବାମନ କରି ଧାରଣ  l 10

କୂଟ ଭିଆଇଲେ ଦେବୀ ପଦ୍ମାଳୟା 

     ବ୍ରାହ୍ମଣୀ ରୂପକୁ ଧ୍ୟାୟୀ 

ବଳୀ ମଣି ବନ୍ଧେ ବାନ୍ଧି ଥିଲେ ରାକ୍ଷୀ 

    ଏଇ ସେ ଗହ୍ମା ପୁନେଇଁ  l 11

ବରଷକେ ଥରେ ରକ୍ଷା ବନ୍ଧନ 

    ଗହ୍ମା ପୁନେଇଁରେ ଆସେ 

ଶରଧାରେ ବାନ୍ଧି ଭାଇ ହାତେ ରାକ୍ଷୀ 

     ଭଉଣୀ ଶୁଭ ମନାସେ  l  12

ରାକ୍ଷୀ ନୁହେଁ ଏହା ମୋ ରକ୍ଷା କବଚ 

       ଜୀଇଁ ରହି ଥବା ଯାଏ 

ପର ଘରେ ଆଉ ଭାଇ ବିନା ମୋତେ 

    ରକ୍ଷା ତ କରିବ କିଏ l  13

କାଳିଆ ବଳିଆ ହାତରେ ଭଉଣୀ 

    ସୁଭଦ୍ରା ବାନ୍ଧୁଛି ରାକ୍ଷୀ 

ସ୍ନେହ ମମତାର ଅତୁଟ ବନ୍ଧନ 

    ଜଗତ ହସୁଚି ଦେଖି l  14 

ଘରେଘରେ କେତେ ମିଠା ପିଠା ପଣା

   ମାଆର ହାତ ପରଶl 

ଭାଇ ଭଉଣୀର କେତେ ହସ ଖୁସି 

   ଅଭିମାନ ରାଗ ରୁଷା  l  15

ଆଜି ବି ଭଉଣୀ ଭାଇ ହାତରେ 

   ଆଦରେ ବାନ୍ଧୁଛି ରାକ୍ଷୀ 

ଭାଇ ଅଟେ ମୋର ଅତି ଆପଣାର 

     ସୁଖ-ଦୁଃଖର ସାକ୍ଷୀ  l  16

ଦେଶର ରକ୍ଷକ ବୀର ସୈନିକ 

   ବାନ୍ଧି ରାକ୍ଷୀ ତାଙ୍କ ହାତେ 

ତାଙ୍କଠାରୁ ଅଟେ କିଏ ବଡ଼ ଭାଇ 

   ଏ ଆର୍ଯ୍ୟl ବର୍ତ୍ତ  ଭାରତେ  ?   17

ଆସ ଆସ ବାରେ ମୋ ପ୍ରିୟ ଭଉଣୀ 

   ହାତେ ଧରି ସୁନା ରାକ୍ଷୀ 

ସେ ମମତା ଡୋରୀ ଭାଇହାତେବାନ୍ଧି 

   ହୁଅ ହେ ପରମ ସୁଖୀ  l  18

       ++++

# ଡଃ ପଦ୍ମଲୋଚନ ରାଉତ 

ମାଲକାନଗିରି