କୃଷକ - ସୌମ୍ୟାଶ୍ରୀ ନାୟକ , ନବରଙ୍ଗପୁର

             ||କୃଷକ||

ଶ୍ୟାମଳ ପଲ୍ଲୀଭୁଇଁର ସୁରମ୍ୟ ପରିବେଶ,

ଦେଶପ୍ରାଣର ଚାବି ଜନୈକ କୃଷକ,

ସହ୍ୟକରି ପ୍ରଚଣ୍ଡ ରୌଦ୍ରତାପର କରନ୍ତି ସେ ଚାଷ,

ଦିଗବଳୟ ସବୁଜିମାରେ ହୁଏ ଦୁଃଖର ନାଶ |

ଶୁଷ୍କ ପ୍ରାନ୍ତର ଶ୍ୟାମଳ ହୁଏ ବିମଣ୍ଡିତ,

ପଲ୍ଲୀର ସୌନ୍ଦର୍ଯ୍ୟ ଦିଗନ୍ତ ହୁଏ ବିସ୍ତାରିତ,

ଆତ୍ମବିଭୋର କୃଷକ ମାଟିର ସନ୍ତାନ,

କ୍ଷୁଧା ନିବାରଣ କରି ବିଶ୍ଵର ବଞ୍ଚାନ୍ତି ଜୀବନ |

ଜୀବନ ସଂଗ୍ରାମରେ କୃଷକ ସଫଳ ସୈନିକ,

ଆହାର ପ୍ରଦାନ କରି ସାଜିଛି ଜନକ,

ନିଷ୍ପ୍ରାଣ ବନାନୀରେ କରେ ପ୍ରାଣ ସଞ୍ଚାର,

ଭୂକ୍ଷେପ କରି ବାରିଧାରାକୁ ହୁଏ କର୍ମତତ୍ପର |

ବଦୁରର ବିକଟ ଚିତ୍କାରେ ଆଜି କୃଷକ ଶୋଷିତ,

ଦୁଃଖର ଘନକୃଷ୍ଣ ବାଦଲରେ ଜୀବନ ଆଚ୍ଛାଦିତ,

ଦାରିଦ୍ର୍ୟତା ସାଜିଛି ଆଜି ଓଳିପାଣି ଗଡି,

ମାଟିର ସନ୍ତାନର ଆନନ୍ଦ ଆସିବ କେବେ ବାହୁଡି |

ବିକଟ କ୍ରନ୍ଦନ ଧ୍ବନିରେ ପଲ୍ଲୀ ପ୍ରକମ୍ପିତ,

କର୍ଦ୍ଦମାକ୍ତ ପଥରେ ଅନ୍ଧାର କୃଷକର ଭବିଷ୍ୟତ,

ଚାଷୀର ଚାଷ ଆଜି ଋଣରେ ସନ୍ତରଣ,

ଶତଗୁଣରେ ବର୍ଦ୍ଧିତ ଚାଷୀ ମୃତ୍ୟୁବରଣ |

ଅସ୍ତଗାମୀ ସୂର୍ଯ୍ୟଙ୍କର ରକ୍ତିମ କିରଣରେ,

"କୃଷି ପଣ୍ଡିତ" ବଞ୍ଚୁଛି ବହୁ ଅସୁବିଧାରେ,

ସାରବିହନ ପାଇଁ ଆଜି ଚାଷୀ ପ୍ରୀତିପଦ,

ଦୁଃଖର ଦୁର୍ବାଦଳରେ ରହିଛି ଚାଷୀର ଦରଦ |

ସ୍ଵାର୍ଥାନ୍ଵେଷୀ ଗୋଷ୍ଠୀ ଶୋଷଣ କରୁଛି,

ଶିଶିରପାତର ଚେକା ମଳିନ ଦିଶୁଛି,

ତାଲିମ ବିନା କୃଷି ପଛେଇ ଯାଉଛି,

ଖାଦ୍ଯାଭାବ ସମସ୍ଯା ଆଜି ବଢି ଚାଲିଛି |

"ସବୁଜ ବିପ୍ଳବ" ଆଜି ମଳିନ ଶଶୀ ସାଜିଛି,

ଜନ୍ମଭୂମି ପଲ୍ଲୀ ବୁକୁରେ ଚାଷୀ ଦୁଃଖରେ ରହିଛି,

ସଂପ୍ରସାରିତ ହୋଇପାରୁନି ଅନ୍ନପୂର୍ଣାଙ୍କ ଭଣ୍ଡାର,

ଉଜୁଡି ଗଲାଣି ଆଜି ଚାଷୀଙ୍କ ସଂସାର |

ଚିନ୍ତିତ ରହିଛି ଆଜି ମର୍କତମଣିଖଚିତ ଚାଷୀ,

ଅଭ୍ରଖଣ୍ଡ ଦୁଃଖର ପର୍ବତ ପଡିଛିକି ଖସି,

ଭାରାକ୍ରାନ୍ତ ଆଜି ଅସହାୟ ଅଭିମାନୀ ମନ,

ବିପଦ ସଙ୍କୁଳରେ ରହିଛି କୃଷକ ଜୀବନ |

କର ଯୋଡି ସଭିଙ୍କୁ କରୁଛି ନିବେଦନ,

ପ୍ରଜ୍ଵଳିତ କରାଇବା ଆମେ ଚାଷୀଙ୍କ ଜୀବନ,

ଅର୍ଥନୈତିକ ପ୍ରଗତିକୁ ସୁଦୃଢ କରିବା,

ଚାଷୀଭାଇଙ୍କ ଦୁଃଖ ହରଣ କରିବା |

ସୌମ୍ୟାଶ୍ରୀ ନାୟକ

ଗ୍ରାମ :- ପାପଡାହାଣ୍ଡି

ଜିଲ୍ଲା :- ନବରଙ୍ଗପୁର