ମୋ ଜନ୍ମଭୂମି - ଉମାକାନ୍ତ ଦଳାଇ , ଖୋର୍ଦ୍ଧା

     

   * ମୋ ଜନ୍ମଭୂମି * 

            -------++++---------

ଚରଣେ ଯାହାର ମରାଳମାଳିନୀ 

ଶିର ରେ ସୁନାର କ୍ଷେତ, 

ବାମାଙ୍ଗେ ଉଦ୍ଧବ ଧ୍ୟାନରେ ନିମଗ୍ନ 

ଦକ୍ଷିଣାଙ୍ଗେ ତାରା ମାତ  !

ହୃଦୟରେ ସ୍ୱୟଂ ଦେବ ମହାଦେବ 

ପଶ୍ଚିମାଭିମୁଖୀ ହୋଇ, 

ଅକର୍ମରେ କର୍ମ ଦେଇଚାଲିଛନ୍ତି 

ଐଶାନ୍ୟ କୋଣରେ ରହି  !

ହୃଦକୁ ଯେପରି ସୁରକ୍ଷା ଦିଅଇ 

ଚବିଶି ପିଞ୍ଜରା କାଠି, 

ଗ୍ରାମକୁ ସେପରି ଜଗି ରହିଛନ୍ତି 

କେତେ ଗ୍ରାମଦେବୀ  ଏଠି  !

ଶୁଭ ସକାଳ ର ବାରତା ଯେଉଁଠି 

ଦିଅଇ ହାତର ଚୁଡ଼ି, 

ଭାଗବତ ଘରୁ ଜଣାପଡେ ଯହିଁ 

ଆସିଲାଣି ସଞ୍ଜ ମାଡି !

ଝଗଡା ଝାମେଲା ଯେଉଁଠାରେ ଭାଇ 

କଥାରେ କଥାରେ ତୁଟେ, 

ଗୁରୁ ଗୁରୁଜନ ଦେଖିଲେ ଯେଉଁଠି 

ଚାଟ ଟିଏ ବାଟ କାଟେ l 

ବାରମାସ ସାରା ତେର ପରବରେ 

ହସୁଥାଏ ଗାଁ' ମୋର, 

ଯବନ ହେଉ କି ସନାତନ ହେଉ 

ନଥାଏ ବାଛ ବିଚାର l 

ହିନ୍ଦୁ ମନ୍ଦିରରେ ଯବନର ଭୋଗ 

ପହିଲି ଧୂପରେ ଲାଗେ, 

ଭାଇଚାରାର ଏ ଅପୂର୍ଵ ସଂସ୍କୃତି 

ଦେଖି ହୃଦେ ପ୍ରେମ ଜାଗେ l 

ଫଗୁଣର ଫଗୁ ପ୍ରଥମେ ପ୍ରେମିକ 

ପ୍ରେମିକା ଗାଲରେ ବୋଳେ, 

ବଡବଡୁଆଙ୍କ କାମନା ମନାସି 

ସାଙ୍ଗ ହୋଇ ଦୀପ ଜାଳେ l 

ଗୁରୁବାର ହେଲେ ଚାଉଳ ଚୁନାରେ 

ପ୍ରେମିକା ଆଙ୍କଇ ଝୋଟି, 

ନଈପଠା ଆଡେ ବିଳମ୍ବରେ ଗଲେ 

ମିଛରେ ପକାଏ କଟି l

ରାକ୍ଷୀ ବାନ୍ଧିଦେଇ ଭଉଣୀ ଯେଉଁଠି 

ଆଶୀର୍ବାଦ ଟିଏ ମାଗେ, 

ଚାକିରି କରିଲେ ଦାମିକିଆ ଜାମା 

ଦେବୁ କହେ ଭାଇ ଆଗେ !

ଜନମ ଦିନରେ ଯେଉଁଠାରେ ପରା 

ପାଲା କିରିତନ ହୁଏ, 

ଦୀପ ଧୂପ ଜାଳି ନବଜାତଟିଏ

ଗୁରୁଙ୍କ ଆଶିଷ ପାଏ l 

ଯାହାର ପବନେ ମଧୁରତା ଅଛି 

ମାଟିଟା ପିୟୁଷ ତୁଲ, 

ସେଇ ମୋର ମା' ସେଇ ମୋର ଗାଁ

ନୁହେଁକେ ତା' ସମତୁଲ l 

ସେଇ ଗାଁ ରେ ମୁଁ ଜନମ ହୋଇଛି 

ସେଇ ମୋ ଜନମ ଭୂମି, 

ମୋ ଦେହେ ବହୁଛି ତା ପାଣି ପବନ 

ଶିରା ପ୍ରଶିରାକୁ ଚୁମି l 

 ଉମାକାନ୍ତ ଦଳାଇ
*ଭୂଷଣ୍ଡପୁର*, ଖୋର୍ଦ୍ଧା
7735068090